ProyectoEspañaFutura

España leva unha década caendo nos informes PISA: estamos 15 puntos por debaixo da media da OCDE en matemáticas. O problema non é de investimento, é de modelo. Recuperar a avaliación externa estandarizada en todos os ciclos e eliminar a promoción automática sen competencias mínimas acreditadas son condicións básicas para que o sistema volva esixir e distinguir. O mérito ten que volver ser un valor nas aulas. A carreira docente non se resolve endurecendo unhas oposicións que xa son esixentes en canto a temario. O problema real son os docentes que, unha vez dentro do sistema, non se actualizan. Un docente que ensina cun temario obsoleto non está formando, está prexudicando. Propoñemos establecer a formación continua acreditada como requisito obrigatorio para progresar na carreira docente, con revisión periódica dos contidos impartidos por área de coñecemento. O soldo do profesor debe ser competitivo co doutras profesións que requiren o mesmo nivel de formación, para atraer e reter os mellores. A Formación Profesional dual, na que o alumno alterna centro educativo e empresa real, é o modelo que funciona en Alemaña, Austria e Suíza e que explica en parte as súas taxas de emprego xuvenil. En España apenas está implantado. Propoñemos estender o modelo dual a todos os ciclos formativos nos próximos catro anos, con acordos vinculantes con empresas. O bilingüismo nos centros públicos non pode ser un privilexio de quen vive no barrio adecuado. Garantimos o ensino en inglés de polo menos o 30% das materias en todos os centros públicos do país antes do fin da lexislatura. O sistema universitario financia con diñeiro público titulacións nas que a maioría de graduados acaba traballando en algo que non ten relación co que estudou, simplemente porque as notas de corte eran baixas e as prazas abundantes. Propoñemos reducir as prazas públicas financiadas en titulacións con alta taxa de paro estrutural. Menos prazas sobe a nota de corte e filtra a quen realmente quere estar aí, sen prohibir nada a ninguén. Os recursos liberados redirixense a enxeñarías, ciencias, tecnoloxía e saúde, onde o país necesita máis titulados e onde hai emprego real. As bolsas deben vincularse ao rendemento académico real, non só aos ingresos familiares, para que o talento non dependa do peto dos pais.